A Soberanía Alimentaria, garantía de futuro

Menú Principal

Menú de Destacados

  1. Portada>
  2. Novas>
  3. Un cento de melidenses concéntranse diante do Concello para esixir a reapertura do mercado labrego dos domingos

Un cento de melidenses concéntranse diante do Concello para esixir a reapertura do mercado labrego dos domingos

24 de Xaneiro do 2021

Concentración Melide

Un cento de persoas, entre as que se atopaban boa parte dos homes e mulleres que venden alimentos na feira dominical de Melide, encheron a praza do Convento nunha concentración de protesta para esixir ao goberno municipal a reapertura inmediata do mercado labrego, sempre baixo o cumprimento estrito dos protocolos marcados polas autoridades sanitarias de cara a evitar a expansión da Covid 19.

Esta acción de protesta obedece á reincidencia do Concello de Melide en prohibir un mercado de alimentos que, por celebrarse ao aire libre, ten mellores condicións de seguridade para a compravenda de bens esenciais que non os espazos pechados. Porén, en contra de toda lóxica, o concello decretou por terceira vez en menos de un ano o peche do mercado sen que houbese ningunha orde de autoridades sanitarias ou políticas que obrigase a facelo, e sen ningún estudo ou informe que indique que no mercado de alimentos labregos se teñan producido gromos ou contaxios de Covid-19.

Consignas como “Queremos mercar os grelos ás veciñas!” ou “Espazos labregos, espazos seguros!” precederon á lectura dun manifesto (pódese descargar íntegro na icona que hai no remate desta páxina) no que se lle esixían catro demandas fundamentais ao executivo melidense:

  1. Reapertura inmediata do mercado dominical de alimentos, reorganizándoo temporalmente coa distribución dos postos de venda en novos espazos que garantan as distancias e os protocolos sanitarios vixentes, tal e como indica o decreto 202/2020 do 3 de decembro.

  2. Dotación de recursos materiais e humanos para garantir o cumprimento dos protocolos sanitarios anti-covid no mercado.

  3. Recomendación a través de bandos, radio municipal e outros medios de difusión ao alcance do Concello de Melide, da opción de adquirir alimentos no mercado labrego como a máis segura na conxuntura actual.

  4. Revisión das políticas municipais de cara a apoiar e reforzar este mercado, xa que con el se apoian a economía local, os proxectos agrogandeiros da bisbarra, o mantemento de postos de traballo, a creación de riqueza no rural ou o reforzamento da nosa soberanía alimentaria diante de crises nas que os supermercados, como ben puidemos comprobar nos últimos tempos, sofren axiña desabastecemento.

Concentración Melide

Ficheiro adxunto