A Soberanía Alimentaria, garantía de futuro

Menú Principal

Menú de Destacados

  1. Portada>
  2. Novas>
  3. Agricultura>
  4. Contra a explotación e o espolio agroindustrial. SUREXPORT FÓRA DA GALIZA!

Contra a explotación e o espolio agroindustrial. SUREXPORT FÓRA DA GALIZA!

17 de Agosto do 2021

surexport1

Dende mediados do pasado mes de xullo diversas organizacións galegas vimos articulando unha fronte común para denunciar as graves prácticas que a empresa SUREXPORT está a levar a cabo na Terra Chá. O mércores 18 de agosto iniciamos campaña de mobilizacións a pé de rúa para denunciar os abusos desta agroindustria.

Comprometidas ca urxencia de pór fin de xeito inmediato á escravitude agroindustrial que a empresa onubense de recolección de froitos vermellos SUREXPORT pretende instalar no noso país, MAÑÁ, MÉRCORES 18 de agosto, as organizacións ADEGA, Asociación Espazo Agroecolóxico “A Estruga”, Comisións Obreiras - CC.OO, Confederación Intersindical Galega - CIG, CS Madia Leva!, Central Unitaria de Traballadoras - CUT, Ecoloxistas en Acción, Federación Rural Galega - FRUGA, Sindicato Labrego Galego - SLG, activistas da loita contra a megaminería, movementos sociais, veciñanza da zona, ex-traballadoras e veciñas/os da contorna onde se está a instalar esta agroindustria iniciaremos unha CAMPAÑA DE DENUNCIA A PÉ DE RÚA.

 

MÉRCORES 18 DE AGOSTO:

 

  • Ás 10.30h. xuntarémonos na Carballeira de Castro para proceder ao REPARTO DE MEDIO MILLEIRO DE PASQUÍNS INFORMATIVOS NA FEIRA DE CASTRO RIBEIRAS DE LEA (Castro de Rei, Lugo).

  • Ás 12.00h. convocamos CONCENTRACIÓN diante da sede de SUREXPORT en Castro de Rei (Lugo), onde serán proporcionadas DECLARACIÓNS AOS MEDIOS DE COMUNICACIÓN e informarase sobre a DENUNCIA que será rexistrada tamén o propio mércores 18 na SUBDELEGACIÓN DO GOBERNO.

 

Dende mediados do pasado mes de xullo diversas organizacións galegas vimos articulando unha fronte común para denunciar as graves prácticas que a empresa SUREXPORT está a levar a cabo na Terra Chá. As testemuñas relatan presións constantes -dirixidas especialmente contra as persoas migrantes-, ameazas de despedimento se non se recollen “cantidades desorbitadas de arando en xornadas de 12 horas”, incumprimento das condicións salariais -as horas extra son pagadas a 6€ en lugar de a 12€-, amoreamento de traballadoras/es sen distancia de seguridade nin máscara durante a pausa da comida, limitación da remuneración do tempo de descanso a só 15 minutos ao día ou a escaseza de auga que dificulta ter unhas condicións hixiénico-sanitarias mínimas.

 

As prácticas nefastas desta empresa tamén se concretan na contaminación de aguas e solos vinculada ao seu modelo de produción agroindustrial, sustentado no emprego de abundantes produtos químicos, así como no acaparamento de terras agrarias para expandir o seus monocultivos, realizando competencia desleal, provocando o abandono da actividade agraria e acelerando o despoboamento do rural.

 

Fai unhas semanas, a posta en coñecemento da Consellaría de Emprego e Igualdade así como da Consellería de Medio Rural na Galiza da posible explotación laboral infrinxida por esta empresa orixinaria de Huelva e integrante dun potente conglomerado agroindustrial, coincidiu no tempo ca contundente denuncia realizada a nivel internacional por parte de observatorios dos dereitos humanos como Danwatch -que motivou a suspensión de contratos con cadeas de supermercados danesas-, e medios de comunicación como Politiken ou o portal de novas Al Jazzeera. Segundo datos da propia empresa, SUREXPORT acapara o sector da produción privada de froitos vermellos -framboesas, amorodos, arandos, moras-, con plantacións en Kenia, Marrocos, Portugal e o Estado español.

 

Contra a explotación laboral, o racismo e o espolio da Galiza

 

 

 



 




 



Ficheiro adxunto